مسا الخير وأهلا وسهلا بمتابعينا على شارع الأصدقاء
الحلقة اليوم رح تكون خاصة
بتتضمن حوار مع شيف الاساغيتي أبو حنين
بنرحب فيك شيفنا المميز وبيسعدنا تواجدك معنا ^^
أبوحنين:أهلاً فيكن وبيسعدني أكتر وجودي بهالشارع المميز ^_*
اللي سمعناه (وجربتو ^_*)أنك طباخ ماهر وخاصة بأكلات المكرونة
وحابين اليوم نسمع منك عن خلطة مكرونة الخضار
أول شي حابين نعرف كيف كانت بدايتك في الطبخ ومن وين تعلمت وليش..؟
_ والله هاد ياستي الغربة بتعلّم متل مابيقولو وخاصة أنو كنت ساكن مع العزوب
والواحد يحن لأكل البيت وطبخ الإيد مو متل الجاهز معتّ ومملّ
فكنت جيب الوصفات من النت وأجري عليها بعض التعديلات لحتى تكون ناجحة
حلو يا أبو حنين ،يعني ماكنت تكتفي بالوصفة إنما لازم تجري تعديلات من عندك معناها نفسك طيبة عالطبخ
بس نحنا حابين نعرف بالأخص عن المكرونة شو قصتك معها ؟
-المكرونة منها اختراعاتي لنو بحبها كتير وبحب التفنن فيها واليوم رح قدّملكن وصفة مكرونة الخضار
أخدت فكرتها من مطعم وأجريت عليه 90%تعديلات لحتى صارت طعمتها متل مابحب ومتل ماعجبهن ليلي أكلوها
ولسى في كتير وصفات منها بالجبنة والفطر ،منها باللحم و…..الخ وبإذن الله بنحكي عنها بعدين
حلو …حلو ..معناها نفسك طيبة عالمكرونة بشكل خاص
ممكن لوسمحت تعطينا الوصفة
شوقتنا ^^
__
(أول شي مدام هالوصفة بتعتمد بشكل أساسي عالخضار
بستخدم فيها
البصل ،(حبة)
الثوم،(رأس كامل)
الفطر
الجزر (3أو4 جزرات)
الفليفلة (حبة)
البندورة(حبة صغيرة)
الزيتون المقطع شرايح
نصف باكيت مكرونة
وهاد يعتبر أساسي وممكن بعض الإضافات اللي ممكن تكون ثمار بحر متل البروكلي
أول شي لازم نقطع البصل والثوم شرائح عبارة عن بصلة وشي نصف رأس ثوم أو واحد كامل
وبنقطع الجزر شرائح بشكل طولي غير سميك والفليفلة بالشكل نفسو
والبندورة بنقطعها مكعبات متوسطة الحجم قريبة إلى الحجم الصغير
بنغسل علبة فطر حسب الرغبة وبنحطها بقدر فيه ماء على نار هادية لحتى تنضج نضج بس مو كامل
وبعدين بنصفيه وبنتركو عجنب
بنحط بصينية للطبخ ملعقة سمنة مع زيت مازولا وبنحطها على نار هادية لحتى تحمى
وبعدين بنسقط فيها البصل والثوم وبنحط فوقو غطا يكون قريب عأسفل الصينية لحتى يضل البخار ونكهة الثوم قوية
بنتركو عنار هادية لفترة ومغطى
بعدها بنحط الفطر فوقو وبنرش عليه ملح وفلفل وبهارات الطاهي وفليفلة حمرا
وبنغطيه بدون ما نحركو أو نخلطن سوا
وبعد شوي بنخلطن وبنغطيهن ليتلفّحو
وقبل أو أول مايصير لون الثوم والبصل ذهبي
بنحط الخضار مع ملح وفلفل وفليفلة حمرا
وملعقتين مية بندورة موزعة بالتساوي عكل الصينية مع مكعب ماجي
وبنغطي الصينية لفترة قصيرة
وبعدين بنحركهن ليختلطو سوا وياخدو من بعض النكهة
وأهم شي تكون النار هادية بكللللل خطوة من خطوات الطبخ
بعد مايكونو نضجو وماعاد الجزر يقرش بنحط المكرونة
وبنحطلها الملح والفلفل والفليفلة الحمرا وبهارات الطاهي
وبنقلّبهن لحتى ياخدو من بعض النكهة تماماً
وبنصبهن بصينية التقديم وبنحط عالوجه الزيتون الشرائح وبنرش فوقو زعتر بري مع خيوط كاتشب
وألف صحة وهنا عألبكن
بتمنى ينال رضاكن وتكونو حرفيين بالتعامل مع طريقة الطبخ لأنها دقيقة وفيها سر النكهة
الطبق قبل الأكل
الطبق بعد الأكل
والله شي طيب شيفنا العظيم
يعني كل مابدي شوفها بدي حس بالجوع
بننتظر وصفاتك الجاية للمكرونة
كتير تشرفنا فيك كضيف لحلقاتنا
وبإذن الله إلنا رجعة
^^
متابعينا وصلنا لنهاية فقرتنا وبنتمنى تكونو استمتعتو معنا
وياريت ترسلو آرائكن ومقترحاتكن أو تحطوها بصفحتنا عالوورد بريس
كنا معكم
مع الشـــــــــيف أبـو حنــين
كونو معنا
^^
______________________________________
هيييييييييييييييييييييييي
يااااااسلااااااااااام
يعني يمكن كون لقيت موهبة فيي كمقدمة برامج
شيفنا أبوحنيييين إذا بتريد عقّب عالمقابلة مشان تقلي إذا في شي من الوصفة خطأ
((بما أني يعني مألّفة المقابلة من عندي لعندي)) *_*
(مقدمة برامج سبعة شارع الأصدقاء) يعني والله كبرت براسي
إشووووو هاااد والله ماعمصدق حالي ^^
هلأ قيمونا من الطبخة وقولولي شو رأيكن فيي كمقدمة ؟؟
مثلاً :
المـــقــدمــــــــــــة الشـــــهيرة :
دعــــــــــــــاء ســبعة شارع الأصــــدقاء
بالاسم الرباعي
^^
ويييييييييي مبسوطة عالفاضي ^_*
يلا كانت معكم المقدمة :
دعــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــاء
ههههههههه… والله مقدمة رائعة ياأم حنين…..
وصفك تمام متل ماطبختها….
وصفة المكرونة للمرة الجاية بالجبنة مع الفطر…
(الشيف أبو حنين)